感謝今日罷工罷課嘅手足
雖然今日罷工對比起八月五日的確好似迴響小咗好多，但的確有唔少人罷工。
一個人唔返工就叫曠工，一大班人唔返工先叫罷工
要做到罷工個效果，真係至少要上到八月五日個氛圍先得。
而今日，迴響咁少，我諗好多原因，可能文宣不足，可能真係撞正今日重要日子唔可以罷工，亦可能做唔到咁頻密嘅罷工日子...等等
無論咩原因都好，今日真係令到唔少人感到失望
特別係今朝早有班手足想凝造返8月5日罷工朝早嘅塞地鐵效果
對於塞地鐵，好多人唔認同，但作為手足，我係不割蓆，各有各做，會支持
但最重要嘅係，呢班手足比人拉咗。
我諗佢地自己都未必預計到個罷工效果係咁同攪不合作運動令到自己比人拉咗
因為連我自己都估唔到，真係好心痛
整個抗爭運動其實好多心理關口要突破
每個行動都要自己判斷係咪正確而做
當你覺得正確時侯，最後就係面對自己
勇武嘅心理關口，就係上前線，面對每行前一步就多一份危機
眼見班狗就喺前面，隨時都會有被捕嘅風險
嗰種壓力真係大到爆
要突破呢個心理關口好難，需要好大勇氣，所以勇武先咁少人，唔係人人做到
就好似跳閘，我都係猶豫咗好多次先敢跳
罷工都係一樣，要面對經濟壓力，要面對公司點樣睇自己
呢種又係另一種無形壓力，要突破係需要勇氣
今日我係無申請任何假期或病假底下罷工
老細都叫我有心理準備承擔後果
但唔知點解，我竟然一啲擔憂都無
反而有種釋懷感覺，總算對得比手足
我亦會諗對比被捕嘅手足，我呢種壓力算得係咩
好多人話罷工有咩用，要罷就全港先得，如果唔係有咩用?
我明，現階段現實上難以實行
但唔係次次都問有冇用先去做
罷工對我嚟講，係一種表態，係一種支持
特別係最近所發生咁癲咁恐怖嘅打壓事件，就更加要表態支持
所以，罷工唔係跟風，唔係望下有冇人罷先罷，而係對自己對手足對呢個極權政府一種表態
如果人人都能夠有呢種覺悟，相信不久將來，一定可以做到8月5日個效果，或者更加大嘅效果
所以，無論點都好，呢個抗爭係長期戰，真係講到口臭
長期戰，難免會有挫敗同失望
但唔緊要，重新振作再去專注就可以
千其唔好質疑運動係咪已經輸咗
千其唔好質疑每個運動有冇用
千其唔好覺得做咩都無用
只要堅持落去，我地先可以嬴，五大訴求先可以爭取返嚟
所以今日無論有冇人罷都好，都係不指責不割蓆，但係都要鼓勵今日突破心理關口嘅手足
罷課
我真心覺得班學生好勇敢
喺社會上，學生面對嘅就係極權政府打壓
喺學校上，學生面對嘅就係校長老師同制度下嘅打壓
試問我地十幾歲時侯，老師罵呀 記缺點記小學呀見家長呀
真係會淆架 (呢家梗係覺得呢啲好小事)
所以今日見到班學生勇敢發聲，面對沉重壓力底下企出嚟
我真心覺得呢班學生好有勇氣 為你地每一個感到驕傲
今日我去咗添馬公園三罷集會
原本落雨，同罷工迴響咁細，我係帶住失望嘅心情去
但發覺現場好多好多人時
我靜靜地坐喺草地一角
吹住涼風 聽住台上分享
望望身邊嘅手足互相支持
我就覺得最近好多事情令到自己太多煩惱同崩緊
嚟集會都可以為自己抖抖氣 減減壓
聽日我都會繼續罷工，有始有終咁支持
亦希望大家唔好放棄 唔好咁快打定輸數 堅持落去
我知道我成日出呢啲文好煩講到口臭，由六月到今日已經有超過500人unlike咗我
但我仍然會堅持落去
就當我作為文宣嘅一個角色工作
我唔想整個事情都降溫 唔想大家淡忘同習慣咗極權政府嘅暴行打壓
另外
最近無論上陣又好，集會又好
我都已經得返自己一個人了
原來一個人真係幾孤獨
希望嚟緊我唔會習慣呢種感覺
而係身邊好多隊友同手足繼續同我出發
Search